Псалъэжь: Нэм пэжыжьэми гум пэблагъэщ.
ПсынщIэрыпсалъэ: Зазэ и зэзыр зэзэмызэ мэуз.
ГушыIэ: ЩIалэм пыIэ къигъуэтащ. Хуэхъупсуращ.
Къуажыхь: НэкIущхьэплъ-плъыжьыбзэ. (Шыбжий)

Къэплъыхъуэр

Ди IуэрыIуэтэ

Япэ курсыр къызоух иджы. Зы профсссорыжь гуэру фIэкI зыкъысщыхъужтэкъым, илъэсыр кIуэху еджэным тIэкIу сегугъуати. Экзаменхэр зэфIэкIмэ, къуажэм зыщызгъэпсэхуну мурад сщIат. ИкIи быдэу сигу ислъхьат зыгъэпсэхугъуэ мазэхэр кIуэху зы тхылъи тетради къэзмыщтэну. Ауэ дэнэт, ди еджапIэм зыгуэр къамыгупсысу хъунт — зыщагъэпсэхукIи чырбыш ящI! Экзаменхэр дымыух щIыкIэ дызэхуашэсри, практикэ хуэдэу адыгэ IуэрыIуатэ зэхуэтхьэсыну ди пщэ къыдалъхьэ.

Хэт и студент гъэмахуэм IуэрыIуатэ зэхуихьэсу пхудэтынур? Дауэ щымытми, унафэ къыпхуащIамэ, зэфIэкIат. Ауэ щыхъукIи, адыгэ IуэрыIуатэр зыхуахьэсыжщ, ябзщ, ядри тхылъуи къыдагъэкIыжат. Дэ щIэуэ къэдгъуэтын хуейуэ арат. Соуэри зыкъомыр тхылъым къызоуд, и ныкъуэри къэзгупсысурэ сотх, си гъунэгъу лIыжь-фызыжьхэм къызжаIэжа хуэдэу. Сыт сымыщIэми, стхын хуейуэ къысхуагъэува мардэм схунэгъэсыртэкъым. Лэжьыгъэр къыщыдатам жаIат зы гъэщIэгъуэн гуэр зыщIыпIи щытрамыдзауэ къэзыхьым и тхыгъэр уииверситетым къыдигъэкIыну тхылъым ихуэнуи, апхуэдэ гуэр схьарэт жысIэрт. Ди къуажэ зы лIыжь-фызыжь къыдэзнэжатэкъым зызыхуэзмыгъэзауэ. Хэт деж сымыкIуэми, адрейм Iэпэ хуащIурэ, къуажэр хъурейуэ тIэу къызагъэкIухьат. Зыгуэр зыщIэхэми, ящIэр я къуэрылъху, пхъурылъху цIыкIухэр тхылъым иту къызэджэу зэхахахэрат. ЛIо сэ ахэр зэрысщIынур? Иужьым, зэманым нэхъ срикъузылIэ щыхъум, гъунэгъу къуажэ гуэр сыкIуэну мурад сощI. Къуажэ сыздэкIуам и Iэтащхьэм и деж сыщIыхьэри, абы къыщызжаIащ ЛоцIыкIу Хьэсэн жыхуаIэр сэбэп къысхуэхъуфыну. СыгуфIэу сокIуэ. Соджэ. БжэщхьэIум зыгуэр къытоувэ. Ауэ абдеж къытеувамрэ сэ а лIыжь жыхуаIэр си нэгу къызэрыщIэзгъэхьамрэ шурэ лъэсрэ я зэхуакут. Сэ си гугъат бжьыфIэшхуэу, ауэ мыбдеж къытеувам ар хужыпIэнутэкъым. Лъахъшэ цIыкIу гуэрт, цIафтэу упса и щхьэм, ибгъу зырызымкIэ тхъурыжь иIащэшхуитI плъыжьу гъэжьауэ къыгуагъэува фIэкIа умыщIэну, и тхьэкIумитIыр къыгуэпIиикIыу. Махуэ хуабэм и джанэр щригъэхагъэнт, щIалэжь цIыкIухэм ещхьу, майкэ пцIанэт. Сэлам изохри соупщI:

  • ЛоцIыкIу Хьэсэн жыхуаIэр уэра?
  • Уей, сэрам. Уэ хэт ухъуну?
  • Сэ университетым сыкъикIри сыкъэкIуащ, IуэрыIуатэ зэхузохьэс.
  • Уи закъуи?
  • Мы гъэм си закъуэщ, схьыр ягу ирихьмэ, етIанэгъэ гупышхуэ къагъэкIуэнущ.
  • Бзэгу гъэкIрахъуэ пIыгъ?
  • Сыту? — Iэнкун сищIащ. Иужьым къызгурыIуэжри:
  • СымыIыгъмэ, куэдрэ ар, «Чаркэ» нэхъыфI хьэмэрэ «Реал» нэхъ къэпщтэн?
  • Хьым, уей, хэбдзын хэмыт. КъакIуэ, мыбдеж ущымытхэнумэ, — жеIэри унэмкIэ сыщIешэ.

Щыуагъэ къэбгъуэтам къыхэгъэщи ипIытIэ сэмэгумкIэ щыт Ctrl-рэ+Enter-рэ.

Напэхэр: 1 2 3

Зыхыхьэр: Дзэгъащтэ Азэмэт, Рассказхэр

Уи цIыхугъэхэм къегъащIэ!




Зыгуэр къэптхыным:

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru
ЦIыхуу еплъар: 435

Сообщить об опечатке

Текст, который будет отправлен нашим редакторам: