ПсынщIэрыпсалъэ: Тебэ фIыцIэм ху пцIынэ цIынэ иупцIащ.
Псалъэжь: Узыхэтым уаймыкIумэ, уи унэ умыкIуэж.
ГушыIэ: Сэ жысIахэр си Iуэхужщ, ауэ уэ зыхэпхар сщIэкъым…
Къуажыхь: Хьэщхьэжьей кIэлъэфщ. (Iуданэ зыфIэлъ мастэ)

Джекэ

Тхьэмахуэ зытIущ хьуауэ къуажэм сымыкIуэжауэ иджы сыдохьэж. И кIэр игъэджэгуу ди хьэ хужь пэ фIыцIэ цIыкIур къыспежьауэ, сыкъеуфэрэзыхь. Сэри сыхуогуфIэри, сепсалъэурэ унэмкIэ сокIуэ: «Сэри сигу укъэкIащ, Джекэ, мамэ сымэ щIэс?» Джекэ и хьэлт унэм ущыщIыхьэкIэ, бжэм Iуувэрэ уи гъуэгур IуищIэу къоплъу къэувыжын — игу упымыкIыу арат абы къикIыр.

Къэхъуркъэ-тIэ, зы щIыпIэ гуэрым, хьэпшыпым, цIыхум е Iуэхугъуэм гупсысэ гуэрхэм ущыхашэж, уигу къыщагъэкIыжIа?! Иджыпсту апхуэдэ щытыкIэ сригъэуват хьэм. Мыбы и плIэ лъакъуэ ижь зэпымыууэ кIэзызым сигу къигъэкIыжат си сабиигъуэм щыщ зы Iыхьэ цIыкIу. Ар куэд къыбжезыIэ, гъащIэм упхызыгъэплъ гукъэкIыжт…

Езы Джекэ абы щыгъуэ шырыбзэт, щабабзэт, IэфIыбзэт. Мы хьэр жэрумэ хуэдиз фIэкIа мыхьуу и анэм дзапэкIэ кърихьэкIырт. И шырым дыбгъэдыхьэмэ, зыгуэр къыщыдгъэщIынкIэ шынэу, нажэрти и нэ нэщхьеитIымкIэ лъаIуэ щIыкIэу къыдэплъу къэувт. Анэгур зэрытхьэмыщкIэр нэхьриуи фIэщ ищIырт абы. «Анэ гумащIэр фымыгъэгузавэ». жиIэрти, дэри шыпхъу нэхьыжьым дыкъыIуишыжт…

Иджы къэдгъэзэжынщ гукъэкIыжым сыхэзыша Джекэ и лъакъуэ кIэзызымкIэ. Ар езы хьэр зэрышыр лъандэрэ — и анэр зэрылIэрэ апхуэдэт. И анэр пасэу IэщIэкIат.

Сабиигъуэр гукъинэж гуапэ мэхьу, ар унэм ущIэс зэпыту умыгъэкIуамэ. Губгъуэм, псыхьуэм, джабэм къыщыбжыхьу уи махуэхэр бгъэкIуэныр сабий куэдым иджы ямыIэ насыпщ. Махуэ хуабэ дэдгъэкIыртэкъым псым, джабэм дымыкIуэу. УмыкIуэнкIи Iэмал иIэтэкъым, апхуэдизу ахэр тпэгъунэгъути. Ди хьэри арат — псыхьуэм куэдрэ дэтт. Аращ зытекIуэдэжари… А махуэм, адрей махуэхэми хуэдэу, хьэр псыхьуэм кIуащ зыгъэпскIакIуэ. Къэхьунур зыщIэ гуэрхэр щыIэу жаIэми, ди хьэр абыхэм яхиубыдатэкъым. Армыхьуамэ, дэкIынтэкъым пщIантIэм.

«КъиукIыкI» дыджэгуу пщIантIэм дыдэтт, Джекэ и анэм лъы къыпыжу къыщыдыхьэжам. Фоч уэ макъ къыщыIуамкIэ дызэрыхьащ. Жыг хадэм уилъадэмэ, псыхьуэр хуиту плъагъурти, фоч зыIыгъыу блэкI лIитIми гу лъытэгъуейтэкъым. «Джэдкъазыр яшх», — жаIэурэ псыхьуэм хьэ хьэулей дэтхэр щаукI щыIэт абыхэм. Дыдейри хьэ хьэулейуэ хуагъэфэщат.

— Ди хьэм фыкъыщIеуар сыт? — и губжьым щыгъуазэ ищIащ ди шыпхьум лIитIыр.

— Уэ дызэрыномыуам щхьэкIэ гуфIэ, КIуцэ! — къэIужащ дыхьэшх зыщIэт макъ гутехуэгъуейр.

Мамэ хьэм и уIэгъэр хуипхащ, ауэ узым игъэгумэщI тхьэмыщкIэр тхуэшхакъым. Дэ хьэм дыжьэхэст, и шырри пэIэщIэ тщIыртэкъым. ЕтIуанэ махуэми шхакъым хьэр, нэщхьейт. Ещанэ махуэм и пщэдджыжьым Джекэ и анэр пщIантIэм дэдгъуэтэжакъым. Псыхьуэм къыщыдгъуэтыжащ лIауэ. «Хьэхэм я псэр зэрыхэкIынур къыщащIам деж пщIантIэм докI», — жиIат папэ. Иджы согупсыс: «псэущхьэхэм я бзэр псалъэу щытамэ, сыту пIэрэт хьэм уэсяту къигъэнэнур? Си шырым фыкълъыплъ, сэ сызукIам пэщIэвмыгъахуэ», -жиIэну хьунт.

Хьэм къигъэна шыр цIыкIум и лъакъуэ лъэныкъуэр кIэзыз хьуат. Щтэм къыхихагъэнт, анэм шэ къыщытехуам.

Джекэ и шырыгъуэм къыщищта гупщIэузым сэ си сабиигъуэм сихьыжри, балигъынэкIэ абы сыхигъэплъэжат. Си щIыбагъкIэ къыщыIуа къаз кIий макъырщ гупсыси гукъэкIыжи къызэпызудар. Джекэ и ныбжьэгъур къэсауэ къеджэрт. ГъэщIэгъуэнщ хьэмрэ къазымрэ я щытыкIэр — я псэр зы чысэм илъщ жыпIэнщ. ХьэлкIэ нэмыщI адрей къаз къомым а зыр къахэщырт теплъэкIи — езыр хужьыбзэт, нащхъуэт. Джэдкъазым яхыхьэртэкъым ар куэдрэ. Джекэ и гъусэмэ нэхъ къищтэрт. Хьэм бгъурыст е и щхьэр абы кIэщIэIуауэ щытт. Сигу къокIыж: джэдкъаз ишхыу «пцIы къытралъхьэри» яукIауэ арат мы хьэм и анэр. ЗэныбжьэгъуитIым — хьэмрэ къазымрэ — сеплъырти, къысщыхъут дэтхэнэми ныбжьэгъум щхьэкIэ сытри хуэщIэну. Псэущхьэхэм яку дэлъ зэныбжьэгъугъэр нэхъ быдэу пIэрэ-тIэ?!

Щыуагъэ къэбгъуэтам къыхэгъэщи ипIытIэ Ctrl+Enter.


Зыхыхьэр: Вагъуэ цIыкIу, Гугъуэт Заремэ, Ди прозэхэр, Рассказхэр

Уи цIыхугъэхэм къегъащIэ!




Зыгуэр къэптхыным:

Иужьрейхэр

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru
ЦIыхуу еплъар: 301

Сообщить об опечатке

Текст, который будет отправлен нашим редакторам: