ПсынщIэрыпсалъэ: Жамыбгъэ бгъэгу хужь мэжьэгъуашхэ.
Псалъэжь: Псалъэ дахэм гуауэр пщегъэгъупщэ.
ГушыIэ: Зыри жызмыIэм щыуэну къыщIэкIынкъым.
Къуажыхь: Махуэм лы гулъэ, жэщым гунэщI. (Вакъэ)

Си Iэлъыныр узот

зэрысщIэжрэ щIым телэжьыхьу щытащ, итIанэ кофе, рестораным зритащ. И IитIкIэ къилэжьыжымкIэщ дызэрыпсэур. ЗэикI дыгъуэу, иджыпсту дызыхуэзахэм хуэдэу щытакъым. Абы жиIэт зэпымычу, уи пщIэнтIэпскIэ къэблэжьыр нэхъ IэфIщ. ЦIыху къэс гупсысэкIэ зырыз яIэщ. Хэти къилэжьыр ешхыж, хэти нэгъуэщI гуэркIэ зрегъэгъуэт зэрыпсэун. Дунейр инщ. Щхьэж гъащIэм пэж къыхихым тетщ. Сэ къызэрысщхъумкIэ, щыуари гъуэщари и чэзур къэсмэ, тхьэшхуэм зэхигъэкIыжынущ. Мы щIыналъэ судхэм сыт жамыIэми, Алыхьышхуэрщ ди нэхъыщхьэр. Абы и Iэмырщ дуней псор. А зырщ гъащIэр къытхэзылъхьэр…
Ауэ, дауэ къигъэхъуфа дэ къытщыщIахэр? – къызгурыIуэркъым. Хьэмэрэ, ди щыуагъэхэр тпшыныжу пIэрэ? Е, дызыхуэкIуа насыпыншагъэр пIалъэкIэ щыIэу ара? ЗэрызэфIэкIыу, гуфIэгъуэ гуэр тыгъэу щытыну? Дапхуэдэу зэхэщIыхьами, си ягъэкIэ къэхъуар зэрыщытым хуэдэу къызощтэр. СхузэфIэкIыу зыри къэзгъэнэнукъым. ХэкIыпIэ нэхъ фейдэ зыпылъым сылъыхъуэнщ. Ялыхь, сынолъэIу укъыддэIэпыкъуну, лIыгъи къытхэплъхьэну! Ди Iуэхур шынагъуэми, дыпэгъэлъэщ.
Сыздэгупсысэм, унафэ къытхуащIам дытету, унэмкIэ доунэтI. Я Iэщэхэр къызэрыттраубыдауэ, мы цIыхухэр езыхэр зыщохьэжхэр. Къэгубжьахэр зэгуопхэ, зэгурыуэртэкъым. Хэт ищIэрэ, дапхуэдиз хъуауэ загъэпщкIурэ мыбыхэм, тэмакъкIэщI хъуауи къыщIэкIынщ. Ахэм я зэхущытыкIэ телъыджэм дэ дыдэмыкIуэдарэт.
ДакъикъипщI нэхъ дэмыкIыу хадэмкIэ дыдэкIыжри, ди унэр къыкъуэщащ.
— Мора? – жи, япэу къытхуэза щIалэ нэхъ плIабгъуэм.
— Зыри жезмыIэу си щхьэр сощI.
— Умыгузавэ зыкIи. ДынывэIусэнукъым. Сэ укъызогъэгугъэ абыкIэ.
Куууэ сыбэуа фIэкIа цIутI къыфIэзгъэкIакъым.
— Мадинэ, уи цIэр зэрыдахэм хуэдэу, уэри утхьэIухуди.
А псалъэхэр щызэхэсхым шынэ нэхъ Iейуэ сигу къокI. Мыпхуэдиз хъыджэбзыр дауэ дыхъужыну, ягу Iей гуэр къэкIмэ? Дуней еплъыкIэр дапхуэдэу щымытми, щIалэр щIалэщ.
Ди къуажэм цIыху дэсахэри дэкIуэдыкIам ещхьщ. Зы щыбауэркъым. Зыми дызэримылъагъу дэIэпыкъуэгъуншэу дыкъонэр. Сыт уалъагъукIи, лIыжь-фызыжьщ зыкъэмынэу. Зыгуэрурэ унэмкIэ щIэсхам къащIамэ, щIэпхъуэжынт. ИтIанэ дэри дыкърагъэлыжынтэкъэ?
— Сэ укъызэрызэджэнур Молэщ, – жи сыхуэмейуэ псэлъэгъу схуэхъуам. Си нитIыр къэсIэту сыщеплъы, гу лъызотэр адрейхэм и плъэкIэм зэремыщхьым. Мыр къызэрыгуэкIщ. Зы уз гуэри зэрихьэу къыщIэкIынщ. И Iэ лъэныкъуэр быдэу зыкIэрекъузэ.
— Мадинэ, — щэхуу зыкъысхуегъазэ, адрейхэм захригъэхыну хуэмейуэ, — псалъэ узот, зыри къэмыхъункIэ, узыншэу фыдутIыпщынкIэ, щэхуу фыщытмэ…Уи ныбжьэгъухэм къагурыгъаIуэ ар.

Унэм дыщыщIыхьам, сыкъэмэхт – къиутыкIауэ, а фIейм си хьэщIэхэр лъэкъуащхьэкIэ хэтт, къыстепсэлъыхьу. Зы закъуэт яхэмытыр. Ари Сэкимэт.
— Сыту фыкъэбзэлъабзэIуэ! – мэдыхьэшххэр дызыубыдахэр.
Дэ дызыщIакъуэри пэш нэхъ иныIуэм дыщIаубыдащ. Мыбы унэлъащIэ куэди щIэттэкъым. Зы лъэныкъуэмкIэ диван, блыным ихъуреягъыр иубыду, кIэрытт, абы и гупэм япэм щыIахэм хуэдэ телевизор щытт. Лъэгум пэлас къуэлэнышхуэр илът. ДрагъэтIысэкI, хэт лъэгум, хэт диваным, ди Iэхэр щхьэщIыбагъым тетлъхьауэ. ЩIалэхэр нэщхъейщ, хъыджэбзхэр зэщIогъуагэ.
— ЩIыхьэ! – макъ къэIури, бжэр къыIуах. Сэкимэ жейбащхъуэу къыщIахуэр. Къэхъуахэр къыгурымыIуащэу зеплъыхьыр. ТхьэмыщкIэ, езэша цIыкIум зигъэпсэхуну гъуэлъауэ къыщIэкIынт. И напIэм нэпсхэр къытелъэдауэ къызоплъыр ар. Сэ си гур узу къокIэзызыкI. Пэласым къотIысэхыр си гъусэу. Псори дыщэхущ, дакъикъэ зыбжанэ макIуэ апхуэдэу. ИтIанэ гъы макъхэр нэхъ ин къохъур. Iэщэ къызэшэкIа дыкъэзухъуреихьахэри нэ IейкIэ къытхуоплъэкI.
КъызгуроIуэр зэрафIэмыфIыр. Си Iэпэ кIэзызыр Iупэм Iуслъхьэурэ, солъаIуэр – щэхуу! Армыхъумэ даIэщIэукIэнщ. Захезмыгъэхыурэ соIущащэр – зыфIыгъ, зыри къыдащIэнукъым. Ауэ сакъыгурымыIуэк къысщохъур. Я нэхэр щIрагъэлъэфыкI. Мыпхуэдиз цIыхум я псэр дзапэм пылъщ. Си нэпсхэр къысфIехми, зызмыIыгъыжу хъуркъым. Сахоплъэр дэтхэнэми и нэгу итыр къэсщIэну сыхэту. АрщхьэкIэ зыми и гу къысщIэгъуркъым. Зыми сызыхащIыкIкъым. Дэнэ мыгъуэ щысщIэнт, ди Iуэху дахэу къежьар мыпхуэдэу хъуну. Си еджэгъухэм сагъэкъуаншэу къыщIэкIынщ. Хэт дапхуэдэу щымытми, ныбжьэгъу щIыжаIэжыр мыпхуэдэ гуэрщ. Зухра иджыри къэс си гъусам соплъыр. А зырщ иджыпсту къэнар! Ауэ нэхъыфI дыдэщ жыхуэсIэу щытар нэхъ Iейуэ къыщIокI. ХулъэкIамэ, нэкIэ сиукIынт. Сыт мыгъуэ фхуэсщIэн? Сэ сыхуейуэ къэхъуакъым мыр! –

Щыуагъэ къэбгъуэтам къыхэгъэщи ипIытIэ Ctrl+Enter.

Напэхэр: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30

Зыхыхьэр: КIарэ Альбинэ, Прозэ

Уи цIыхугъэхэм къегъащIэ!




Зыгуэр къэптхыным:

Иужьрейхэр

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru
ЦIыхуу еплъар: 5 290

Сообщить об опечатке

Текст, который будет отправлен нашим редакторам: