Псалъэжь: ЗыщIэм жиIэркъым, жызыIэм ищIэркъым.
ПсынщIэрыпсалъэ: Жамыбгъэ бгъэгу хужь мэжьэгъуашхэ.
Къуажыхь: Ди мэл хужь цIыкIу псыбафэщ. (Кхъуей)
ГушыIэ: Ахъшэм зэ иухын щIедзэ, зэм щIидзэн еух.

ПщIыхь псэгъапцIэ

ФIыгъуэмрэ фыгъуэмрэ зэращIылIа зэдауэ, зэзауэ, зэрыукI гущIэгъуншэм, IэубыдыпIэншэм я зэхуаку къыдэспхъуэтыкIа си гурыфIыгъуэм, си насып кIэухыншэм, си дуней гъащIэр щIэщыгъуэкIэ схуэзыгъэнщIым пхуэслъэгъуащ ныжэбэ пщIыхь. Нэщэнэм я нэхъ хъуэпсэгъуэр къызыхэтэджыкI, гур зыщIэхъуэпс, псэр зыщIэзыгъапсэ гурыфIыгъуэхэр къызыхэхъуэпскIыкI пщIыхь дахащэ. Си лъэр щIым тримыубыдэжу, си гур си бгъэм къысфIилъэтынкIэ сигъэшынэжу сегъэпсэу си нэгу щIэкIам… Зэгуэрым гъуэгущхьэм къытезнэу сабэмрэ нэпсымрэ езгъэтхьэлэжа гугъэ кIапэлъапэхэм я лъыхъуакIуэ щхьэхуимыту срегъэжьэж а пщIыхьым. Емызэшыжу фо зэхуэзыхьэс бжьэ унагъуэм я лэжьэкIэм сригъэхъуэпсэн мурад иIэ хуэдэ, гъащIэм и къудамэ гуэрэнхэм си гугъэ-щыгъэхэр къыпызегъэхыж – псэм акъылыр и дэлэлу, дзыгъуэ гъуанэ дихьа къэзмыгъанэу, гугъэ щыкъуейхэр залымыгъэкIэ зэхузегъэхьэсыж. «Упсэуну сыту фIы!» – щIыжысIэн щхьэусыгъуэхэр куэду си пащхьэм къизылъхьа пщIыхьым къигъэщIа къару лъэщым си блэкIамрэ си къэкIуэнумрэ хуэсакъыпэурэ зэбгъэдегъэкIуэтри, Iэдэбу я зэхуаку дегъэзагъэ зэуIу, зэкъуэт, зэрыIыгъ хъужа гугъэхэм къахищIыкIа гурыфIыгъуэшхуэр. Ар абы си нобэм дыгъэпс гуакIуэу кърекIых. АпщIондэху си гур къогуфIыкI, къогушхукI, си пщэдейм и плъыфэ зэмыфэгъухэр напIэзыпIэм си нэгу къыщIоувэ. Сыт щыгъуи фIым щIэхъуэпс си псэр зыхуэпабгъэ, зыщIэбэг дахагъэ псори нэрылъагъу зэрыхъунум къыпкърыкI гупсысэхэм зэшыпIэ срагъахуэркъым, сытрагъэпыIэркъым. ТыншыгъуэкIэ къызэтэу, гурыфIыгъуэкIэ сызыгъафIэу си хъуреягъыр зыгъэщхъуэкIэплъыкIэ пщIыхьыр къыздэтIысу, къыздэтэджу, къыздэбакъуэу сегъэпсэу. Уафэ къащхъуэр уи нэгуу сегъэлъагъу, сызэрыбауэ хьэуам уи джэрпэджэж щызэхызегъэх. КъысхуэгумащIэрэ сыфIэпсэкIуэду зи кхъуакIэхэр къысхуэзыгъэджэгу дыгъэр уи хуабагъкIэ, уи гуапагъэкIэ къысхуоупсэ. А псор зыхэзыщIэ, зыгъэунэху си гум къыспэплъэ гъащIэм сыхуегъэпабгъэ – уэ ущызгъуэтыну, ущызыхэсщIэну гъащIэм… ПцIапцIэу, цIанлъэу, цIэнтхъуэрыгъуэу зэгуэр къысхущIэкIыжынкIэ хъуну гъащIэм – пщIыхь псэгъапцIэр щыскIэрымыкI гъащIэ…

Щыуагъэ къэбгъуэтам къыхэгъэщи ипIытIэ сэмэгумкIэ щыт Ctrl-рэ+Enter-рэ.


Зыхыхьэр: «Шыхулъагъуэ» хасэм хэтхэм я прозэхэр, Жамбэч Рабия, Жамбэч Рабия и прозэхэр, Прозэ

Уи цIыхугъэхэм къегъащIэ!




Зыгуэр къэптхыным:

ЦIыхуу еплъар: 241

Сообщить об опечатке

Текст, который будет отправлен нашим редакторам: