ПсынщIэрыпсалъэ: Тебэ фIыцIэм ху пцIынэ цIынэ иупцIащ.
Псалъэжь: Былым къыпэкIу нэхърэ насып къыпэкIу.
ГушыIэ: Псы емыжэхым, бдзэжьейр къыхэпхынукъым.
Къуажыхь: Ди гуэнэщ бгъитI щызэрошх. (Щхьэл)

УджыпIэ Iуащхьэ

Хъудымыжь, нартхэ я гъукIэр, Iуащхьэ тегъуалъхьэри жейм хилъэфащ. Жеямэ, жэщибл-махуиблкIэ къызэщыужыртэкъым Хъудымыжь. Сосрыкъуэ, шууэ блэкIрэ пэт, Iуащхьэм жеяуэ телъ Хъудымыжь ирихьэлIащ. Бгъэдыхьэри еджащ– къыхуэгъэушакъым.

– Сэ уэ сыпхурикъункъэ!– жери Сосрыкъуэ Хъудымыжь ипхащ.

Жэщибл махуиблкIэ жейри, Хъудымыжь къызэщыужащ, къыдэплъейри Сосрыкъуэ къыIуплъащ.

– Сосрыкъуэ жыхуаIэр уэра?– къеупщIащ пхауэ здэщылъым.

– Сэращ,– жиIащ Сосрыкъуэ.

– СутIыпщыж, лIым мыпхуэдэ иращIэркъым.

– УзутIыпщыжынщ, жысIэр къысхуэпщIэмэ,– жиIащ Сосрыкъуэ.

– ПхуэсщIэнщ, схузэфIэкIынумэ.

– ПхузэфIэкIынущ. Хы Iуфэм укIуэнщи, Iэнлъэ из шыгъу дамащхьэкIэ къысхуэпхьынщ.

– Къыпхуэсхьынщ,– жиIащ Хъудымыжь.

– Мазэ пIалъэ узот. Сэ мы Iуащхьэм сыщыножьэнущ. Шыгъур къэпхьрэ укъэкIуэжмэ, «ирикъунщ» жысIэху, ууджынщ, шыгъу Iэнлъэр уи дамащхьэм зэрытелъу.

– Iэнлъэ дэнэ къисхын?

– Мо жыгейм уеувэлIэнщи, къыхэпхынщ. Уи дамэм теплъхьэнщи, хы Iуфэм укIуэнщ.

– Къыхэсхынщ,– жиIащ Хъудымыжь.

– Шыгъухьэ укIуэнкъэ?

– СыкIуэнщ шыгъухьи.

– Ууджынкъэ, «ирикъунщ» жысIэху?

– Сыуджынщ.

Псалъэ иригъэтри, Сосрыкъуэ Хъудымыжь иутIыпщыжащ.

Хъудымыжь жыгейм еувалIэри Iэнлъэ хихащ, ар и дамащхьэм трилъхьэри шыгъухьэ ежьащ.

Мазэ дакIауэ, Хъудымыжь къигъэзэжащ, Iэнлъэм из шыгъу дамащхьэкIэ къихьри.

– Иджы ууджынщ,– жиIащ Сосрыкъуэ.

Хъудымыжь, Iэнлъэр и дамащхьэм зэрытету, Iуащхьэм дэкIуейри уджын щIидзащ. Жэщибл-махуиблкIэ иригъэтIысэхакъым Хъудымыжь, жэщибл-махуиблкIэ игъэуджащ.

– Ирикъунщ иджы,– жиIащ Сосрыкъуэ, жэщибл-махуибл дэкIа нэужь.

– ПщIэнтIэпсыр къысхэпхуащ,– жери Хъудымыжь етIысэхащ.

– ДяпэкIэ убэлэрыгъынкъым,– жери Сосрыкъуэ ежьэжащ.

Хъудымыжь и уджыпIэ IуащхьэкIэ еджэ хъуащ ар Сосрыкъуэ жэщибл-махуиблкIэ щигъэуджа Iуащхьэм.

Щыуагъэ къэбгъуэтам къыхэгъэщи ипIытIэ Ctrl+Enter.


Зыхыхьэр: Нарт Эпос, Сосрыкъуэ

Уи цIыхугъэхэм къегъащIэ!




Зыгуэр къэптхыным:

Иужьрейхэр

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru
ЦIыхуу еплъар: 76

Сообщить об опечатке

Текст, который будет отправлен нашим редакторам: