ПсынщIэрыпсалъэ: Зазэ и зэзыр зэзэмызэ мэуз.
Псалъэжь: Бэрэ хашэ иш фIокIуэд.
ГушыIэ: Лейхэр псори - сабийхэм!
Къуажыхь: Iуащхьэ щIыб бгъитI щызэрошх. (Лэныстэ)

УздэщыIэр

Къахьар Сосрыкъуэ ихьыжащ (3)

Гъуд къалэ якъутэн мурад щащIым, нартхэ Сосрыкъуэ ирагъэджащ:

– Ныддежьэ, Гъуд къалэ ткъутэнурэ фIыгъуэ дэлъмэ къыдэтхынущ,– жари.

– Сэ сыкъэзыщIэ абы дэсщ, ягу къызэбгъэнщ,– жери Сосрыкъуэ яхуидакъым.

Нартхэ Гъуд къалэ якъутащ, фIыгъуэу дэлъыр къыдахри къагъэзэжащ. ЗэхэтIысхьэжри, фIыгъуэр ягуэшын щIадзащ.

Ягуэшын щIадзэри, зэщыхьэжащ. Щызэщыхьэжым, Сосрыкъуэ деж Батэрэз ягъэкIуащ:

– ФIыгъуэр тхуэгуэш,– жари.

– Дауэ фхуэзгуэшын, Батэрэз: къалэр щыфкъутэм сыфхэтакъым,– жиIащ Сосрыкъуэ.

– Укъытхэмытами, тхуэгуэш, узмышауэ сыкIуэжынукъым,– къыхигъэзыхьащ Батэрэз.

Къыщыхигъэзыхьым, Сосрыкъуэ нартхэ яхыхьащ.

– Уэ къызэрытхуэбгуэшкIэ арэзы дыхъунщ, уи тхьэ узэреплъщ,– жаIащ нартхэм.Укъытхэмытами, уэри Iыхьэншэ зумыщI!

Сосрыкъуэ къуентхъым хэплъащ. Щыхэплъэм, зы фэ Iэнэжь, зы щIопщ пагуэжь, зы псырыкIуэ вакъэжь къыIэщIэлъэгъуащ. ЗекIуэ ежьэмэ Гъуд къалэ щепсых и хабзэти, Сосрыкъуэ фэ Iэнэжьми, щIопщ пагуэжьми, псырыкIуэ вакъэжьми щыгъуазэт, къазэрыIэщIигъэкIынт имыщIэр армыхъу.

– Фхуэзгуэшынщ,– жиIащ Сосрыкъуэ,– мы зымкIэ дызэгурыIуэмэ: пхъэ дзасэ зырыз зыжьэдэфIунщ. ФиувыкIынщи, къыспэрыуэ къыхэкIмэ, къыспэрыуам и нэр ифщIынщ. ДызэгурыIуэрэ?

– ДызэгуроIуэ,– жаIащ нартхэм, пхъэ дзасэ зырыз зыжьэдаIури иувыкIащ.

ФIыгъуэр яхуигуэшурэ, фэ Iэнэжьыр къыхэкIащ.

– Си пщафIэм и нэ къыхуокI,– жери, фэ Iэнэжьыр зригъэтIылъэкIащ Сосрыкъуэ.

– Ай, тхьэгъэпцI цIыкIу!– къыхэкIиикIащ БлыпкъкIэщI. БлыпкъкIэщI и нэр иращIащ.

ЩIопщ пагуэжьыр къыщыхэкIым:

– Си шыхъуэм и нэ къыхуокI,– жери, Сосрыкъуэ щIопщ пагуэжьри зригъэтIылъэкIащ.

– Ай, тхьэгъэпцI цIыкIу!– къыхэкIиикIащ ПщэдыкъкIэщI. ПщэдыкъкIэщI и нэри иращIащ.

Сосрыкъуэ къегуэшэкIыурэ, псырыкIуэ вакъэжьыр къыIэрыхьащ.

– Си Iэхъуэм вакъэм пищI щыIэкъым,– жери Сосрыкъуэ псырыкIуэ вакъэжьри зригъэтIылъэкIащ.

– Ай, тхьэгъэпцI цIыкIу!– къыхэкIиикIащ Арыкъшуужьыр. Арыкъшуужь и нэри иращIащ.

Къуентхъыр яхуигуэшри, Сосрыкъуэ шэсыжащ.

– Арэзы фыхъуа?

– Дыхъуащ,– жаIащ нартхэм. Сыт жаIэнт нэгъуэщI?

Фэ Iэнэжьыр, щIопщ пагуэжьыр, псырыкIуэ вакъэжьыр ихьри, Сосрыкъуэ нартхэ яхэкIыжащ.

Щыуагъэ къэбгъуэтам къыхэгъэщи ипIытIэ Ctrl+Enter.


Зыхыхьэр: Нарт Эпос, Сосрыкъуэ

Уи цIыхугъэхэм къегъащIэ!




Зыгуэр къэптхыным:

Иужьрейхэр

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru
ЦIыхуу еплъар: 75

Сообщить об опечатке

Текст, который будет отправлен нашим редакторам: