ПсынщIэрыпсалъэ: Пхъэр сошэр – пхъыр сошхыр.
Псалъэжь: Бланэ лу игу къэкIамэ, къуэладжэ щыщакIуэ.
ГушыIэ: Интернетыр къызэрежьэрэ тхэр еджэм нэхъыбэ хъуащ
Къуажыхь: Хьэлъэ темылъу бом щIэмыхьэ. (Бжэмышх)

УздэщыIэр

Щэуей нартхэм я шыгъажэм зэрыкIуар

ЩэуейЩэуей и адэм деж къэкIуэжауэ щыIэурэ хъыбар зэхихащ и адэкъуэш Уэзырмэс и деж нартхэм шыгъажэ щащIу. А хъыбарыр щызэхихым Къанж и адэм елъэIуащ нартхэм я шыгъажэм кIуэну хуит ищIыну.
– Иджыри ущIэлэIуэщ уэ нартхэм уахыхьэну, ахэр лIыхъужьхэщ, яшхэри бэлыхьхэщ, уэ мы узытес шыри шы пхуэхъунукъым, емыкIу къэпхьынщ апхуэдэшкIэ нартхэм я шыгъажэ укIуэмэ,–жиIащ Къанж.
– ЕмыкIу къыпхуэсхьу уи пащхьэ сыкъихьэжынкъым, си адэ,–жиIащ Щэуей,– сыгъакIуэ, хуабжьу сынолъэIу. ЛIыхъужьщ жыхуаIэ нартхэр слъагъуну си гуапэщ, я лIыгъэр згъэунэхуну си гурылъщ, си лIыгъэри зыдынэсыр къэсщIэжынщ.
Апхуэдизу Щэуей щылъаIуэм Къанж арэзы къытехъуэри жиIащ:
– АтIэ абы укIуэну апхуэдизу ущыщIэхъуэпскIэ кIуэ, ауэ модэ си щIыунэм си шыр щIэтщи абы шэси нэхъыфIщ. Ар шы Iейкъым, жэрщ, уигъэукIытэнкъым.
Щэуей зыри жимыIэу кIуэри и адэм и шыр къыщIишри шэсащ, неуэщ-къеуэри лъэбакъуэ зытIущ фIэкI къимыкIуауэ и адэм и шым и бгыр зэршцIыкIыу игъэтIысащ, и дзажэналъэхэр зэхикъутащ.
– Хьэуэ, си адэ, сэ мы уи шыр шы схуэхъунукъым, си Джэмыдэжьыр къыраухьэкI шы псоми,–жиIащ Щэуей. И Джэмыдэжьыр хъуакIуэу пщIантIэм дэтти къиубыдри зэщIикъузащ.
– Уит, си Джэмыдэжь,–жиIащ абы,– шы псом нэхъри уэ унэхъыфIщ, уэ къуаухьэкIи псори, накIуэ иджы дежьэнщ!
– НакIуэмэ-накIуэ, си Щэуей! Дэнэ ухуейми дыгъакIуэ! – жэуап къритыжащ Джэмыдэжьым.
Шыгъажэм кIуэну ежьащ Щэуей! КIуэм, лъэм, кIуэм, лъэурэ, зы псышхуэ гуэрым IущIащ. А псышхуэм и Iуфэм зэрыIухьэу, Джэмыдэжьыр зэщIэувыIыкIащ адэкIи мыдэкIи хуэмыкIуэу. Щэуей и шым еуэри хъуакъым, еуэри хъуакъым, сыт имыщIэми Джэмыдэжьым зыхуигъэхъеякъым, псым икIын идакъым. ИтIанэ Щэуей къэгубжьри и Джэмыдэжьым и джабитIым лъыпсыр къежэхыу иукIащ, арщхьэкIэ зигъэхъеякъым, ауэ къэпсалъэри,–Сыт сыщIэбукIыр къыптрилъхьауэ? – жиIэри къеупщIащ.
– Мы псым унызэримыкIыр аращ, ныхыхьи никIи соуэнкъым,–иритащ абы жэуап Щэуей.– ЗэикI сэ узэрысцIыхурэ мыбы хуэдэу ущытакъым, иджы сыт къыпщыщIар, щхьэ зибгъэна? !
– КъысщыщIаращ,–уздэкIуэр сщIэркъым. УздэкIуэр къызжумыIауэ лъэмбытI счынукъым, къызжыIи усхьынщ дэнэ ухуеймикI, къызжомыIэкъэ – дызэпыкIащ уэрэ дэрэ.
– Сэ сыздэкIуэр сишым жесIэу сесакъым икIи си мурадкъым жесIэну, си щхьэр умыгъэузу ныхыхьи никI мыбы! – щIэкIиящ Щэуей и Джэмыдэжьым.–Армыркъэ – сэ дуней уэзгъэлъагъунщ, уэ иджыри фIыуэ пцIыхуркъым Къанж и къуэ Щэуейр.
– КъызжумыIэнум къызжомыIэ, къызжомыIэм сэри сыкIуэнукъым зыщIыпIи, ухуеймэ сыти къызэщIэ, укъызэуэми-сыпхуэукIынукъым, сыбгъэшынэну уигугъэмэ – сыпхуэшынэхэнукъым, Къанж и къуэри фIыуэ соцIыху,–жиIащ Джэмыдэжьым.

Щэуей ар щызэхихым нэхъри нэхъ Iеижу къэгубжьри аргуэру и Джэмыдэжьыр хуабжьу зэхиубэрэжьащ, ауэ итIани зыхуигъэхъеякъым. Сыт хуэдизкIэ иубэрэжьми, сыт иршцДэми, сыт жриIэми зыричакъым, щымыхъум итIанэ еубзащ:
– Уэ си Джэмыдэжьу си шыфI, уэ бжезмыIэн сэ сиIэкъым. Уэзырмэс и деж нартхэм шыгъажэ щащIри абы докIуэ дыкъэжэну, сыт иджы узыхуейр?–жиIащ Щэуей.
– АтIэ ар сощIэри арщ сэри сыщIэмыкIуэр,–жиIащ Джэмыдэжьым.– Шыгъажэм дыбгъакIуэу нартхэм яшхэм сакъыдэбгъэжэнумэ, нэгъази Дэбэч и деж дыгъакIуэ, абы гъущI шыныбэпхищ схуегъэщIи абыкIэ сызэщIэкъузэ. Армырмэ, сыкъыщыжэкIэ сэ сылъэтэнущи, СИ шыныбэпхыр зэпыудынщи уэ жьым устырихынщ. А Дэбэч схуебгъэщI гъущI шыныбэпххэри е Сэтэней, е уи анэм и быдзышэкIэ псыхьыжын хуейщ, армыхъум арикI жьым зэпиудынкIэ хъунщ сэ сыкъыщыжэкIэ.
Апхуэдэу Джэмыдэжьым щыжиIэм, Щэуей занщIэу къриIуэнтIэкIри Дэбэч и кIыщым кIуащ.
И шы Джэмыдэжьыми зигъэщIакъуэу, езыри бэлэбанэу кIыщым Щэуей щыIухьэм, Дэбэч абы къеплъыхакъым, гуи къылъитэхакъым. ИтIанэ Щэуей къэпсалъэри,–МафIохъу апщи, Дэбэч дадэ! – жиIащ.
Дэбэч и щхьэр къиIэтри Щэуей къеплъащ. Мо фейцейуэ хуэпа щауэм неплъщ-къеплъри, зыри жимыIэу гъукIэн щIидзэжащ.
– Уа Дэбэч, шыныбэпх схуэпщIмэ, шыныбэпх уэзгъэщIынут! – жиIащ Щэуей.
– Сэ сыфащIэкъым, сыгъукIэщ,–и щхьэр къимыIэту, губжь хэлъу жиIащ Дэбэч.
– Сэ сызыхуейр гъущI шыныбэпхщ!
Щэуей ар щыжиIэм, Дэбэч и щхьэр къиIэтри нарт щауэр зэпиплъыхьащ, «гъущI шыныбэпх лъыхъуэр лIыгъэншэу къыщIэкIынкъым» – жиIэ щIыкIэу.

Щыуагъэ къэбгъуэтам къыхэгъэщи ипIытIэ Ctrl+Enter.

Напэхэр: 1 2

Зыхыхьэр:

Уи цIыхугъэхэм къегъащIэ!




Зыгуэр къэптхыным:

Иужьрейхэр

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru

КъыддэIэпыкъу

Ахъшэр здэкIуэным теухуауэ…

Ныбжьэгъу лъапIэ!

Уи нэм щIэуэу щымыту зэрыдгъэувын дыхэтащ мы тIэкIур…

Дэ езым ди жагъуэщ икIи тфIэемыкIущ мыхуэдэ къызэрытеддзэр, ауэ нэгъуэщIу хъужкъым — ди сайтыр адэкIи лэжьэн папщIэ мазэм 383 руб. етын хуейщи — дыпэлъэщкъым.

Сайтыр зэгуэр сэбэп къыпхуэхъуам — сыт хуэдизу щытми уэри зыгуэркIэ зыкъытщIэгъакъуэ.

ЦIыхуу еплъар: 212

Сообщить об опечатке

Текст, который будет отправлен нашим редакторам: