ПсынщIэрыпсалъэ: Мыщэр пэщащэурэ мащэм ищэтащ.
Псалъэжь: Бзэгум цIыхур зэрегъэукI.
ГушыIэ: ПсынщIэу къэпщтэжар емыхуэха хуэдэщ.
Къуажыхь: Пшэрым и уэд, уэдым и дагъэ. (Шыгъу)

УздэщыIэр

Мэлэчыпхъу и дыщэ чысэ

Нарт Шужьей и гуащэр иригъэкIыжа иужь, куэд дэмыкIыу Мэлэчыпхъу цIыкIум къыщIэупщIащ. Мэлэчыпхъу и адэ Жагъыщэ деж лIыкIуэ къищIри къыжригъэIащ:

– Сэ си гуащэр изгъэкIыжащ. Уи пщащэу дахащэ цIыкIум сегуэкIуащи унэ гуащэу къызэт,– жиIэри. Шужьей и лIыкIуэм апхуэдэу щыжиIэм, Жагъыщэ гузэващ, жиIэнур имыщIэу, жэуапу иритынур имыгъуэту. Шужьей пэжу жиIэрэ ауан къищIрэ зыхуихьынур ищIакъым. И гуащэ дахэшхуэр иригъэкIыжауэ Мэлэчыпхъу цIыкIунитIэр ишэну щIыжиIэр, сыт имыщIэми, къыхуэщIакъым.

– Сэ си пхъур езыр Iущ дыдэщ, Iуэхур зытетыр гурыдгъэIуэнщи и щхьэм и унафэр езым ирещIыж,– жыриIэщ лIыкIуэми, Жагъыщэр хьэщIэщым къыщIэкIыжащ.

Шужьей и мурадыр Мэлэчыпхъу щыгурагъаIуэм ину дыхьэшхащ:

– И гуащэр иригъэкIыжауэ сэ къысщIоупщIэ! СыдэкIуэнщ мы фэ чысэ цIыкIум из дыщэ къывитмэ,– жиIэри, зы фэ чысэ цIыкIу, ужьафэ хуэдизу къаритащ.

– Мыбы из дыщэ фIэкIа жыдмыIэу дауэ хъун? МащIэIуэщ. Мыбы зы дыщэ IэмыщIэ нэхъ ихуэнукъым,– жиIэт Мэлэчыпхъу и адэжьым, чысэр щилъэгъуам, ауэ итIани и пхъум и щыщIагъэр ищIэжырти дэкIуэрэ ишэм фIэфIт. Гущэ цIыкIу игъэджэгуу щыс нэхърэ, унэ гуащэ хъумэ нэхъ къищтэрт.

Мэлэчыпхъу и фэ чысэ цIыкIур Шужьей и лIыкIуэм ихьри кIуэжащ.

– Мыбы из дыщэ ептмэ Мэлэчыпхъу къыбдэкIуэнущ,– жиIэу, чысэр Шужьейм щыритым гуфIащ.

– Мыбы из дыщэ фIэкIа къызжимыIэмэ Мэлэчыпхъу цIыкIур нобэ къызошэ,– жиIащ Шужьейм.

Шужьейм дыщэ изу илъу кIадэ ин иIэти зэтричри дыщэр фэ чысэ цIыкIум ирикIутэу щIидзащ. Зы IэмыщIэ из ирикIутэри чысэ цIыкIум къищакъым. IэмыщIитI ирикIутэри из хъуакъым. IэмыгцIэкIэ ирикIутэр из щымыхъум пхъэхьэшкIэ ирикIутэу хуежьащ. Шужьей дыщэр пхъэхьэшкIэ ирикIутэрт, ауэ фэ чысэ цIыкIур зэIыкIыурэ нэхъ ин хъу фIэкIа из хъуртэкъым. Ари щымыхъум, Шужьейм дыщэр хьэнцэкIэ ирикIутэу хуежьащ. Дыщэу иIэр псори ирикIута щхьэкIэ, чысэ цIыкIур кIадэм нэхърэ нэхъ ину зэIыкIри дыщэр из хъуакъым. Шужьейр губжьри и нарт щауэгъухэм дыщэу яIэр щIыхуэу къаIихри ари хикIутащ, ауэ чысэм из хуэщIакъым. Ужьафэ хуэдизу щыта чысэ цIыкIур домбеяфибгъу хуэдизу зэIыкIащ. Шужьей абы фIэкIа дыщэ щимыгъуэтыжым, нэгъуэщI Iэмал къыхуэмыгъуэту, дыщэ щIыхуэу къищтар игуэшыжри езым и дыщэри кIадэм ирикIутэжащ. Домбеяфибгъу хуэдизу щыта чысэри ужьафэ хуэдизу цIыкIу хъужащ. Шужьейм ар зэригъэщIэгъуэн ищIакъым.

Фэ чысэ цIыкIур дыщэкIэ игъэнщIу щыхуемыгъэхьыжым, мурад ищIащ ар зищIысыр къимыщIауэ Мэлэчыпхъу деж иримыгъэхьыжыну. Нартхэм хъыбар яригъащIэри щауэгъуу иIэр псори зэхуишэсащ. Нартхэм чысэ цIыкIур зыIэпах, зыIэпалъхьэу еплъахэщ, ауэ зищIысыр, къызытраха зи фэр къищIэфыну зыри къахэкIакъым.

Нартхэ яIэт УэрсэрыжькIэ еджэу фызыжь гуэр, псори къищIэу.

– Мыр Уэрсэрыжь къыхуэмыщIэмэ дэркIэ къэщIа хъункъым,– жаIэри, чысэр Уэрсэрыжь и деж яхьри кIуахэщ.

– Нарт щауэхэм дыщэу диIэу хъуа псор мы чысэ цIыкIум иткI утащи из тхуэхъуркъым. Мыр зищIысыр къыджыIэ,– жаIэри, Уэрсэрыжь чысэр иратащ. Уэрсэрыжь чысэ цIыкIур зэпиплъыхьри,– А, си щIалэхэ! Нартхэ дыщэу яIэр псори ифкIутакIи мыбы из фхуэщIынкъым. Мыбы из хъуауэ, мыбы зигъэнщIауэ зылъэгъуа зыри щыIэкъым. Мыбы мылъкурэ былымрэкIэ зигъэнщIауэ зэман къэхъуакъым. Мыбы зэрызигъэнщIу щыIэ закъуэр щIыщ. Мыбы зевгъэгъэнщIыну фыхуеймэ, япэ щIыкIэ щIыгулъ тIэкIу ифкIути, итIанэ дыщэ ифкIутэж. Мыр цIыхум и гум телъ фэр аращ,– къажыриIащ Уэрсэрыжь.

Нартхэр къэкIуэжхэри апхуэдэу ящIащ: япэ щIыкIэ щIыгулъ тIэкIу иракIутэри итIанэ дыщэр щракIутэжым зы Iэбжьыб нэхъ имыхуэу чысэм из хъуащ. Шужьей зыхуейр арати дыщэр изу чысэр Мэлэчыпхъу цIыкIум къыхуригъэхьыжащ.

Щыуагъэ къэбгъуэтам къыхэгъэщи ипIытIэ Ctrl+Enter.

Напэхэр: 1 2

Зыхыхьэр: Мэлэчыпхъу, Нарт Эпос

Уи цIыхугъэхэм къегъащIэ!




Зыгуэр къэптхыным:

Иужьрейхэр

Къытхыхьэ

Сайтым къихьар

Яндекс.Метрика Счетчик PR-CY.Rank Рейтинг@Mail.ru
ЦIыхуу еплъар: 242

Сообщить об опечатке

Текст, который будет отправлен нашим редакторам: